- الأديب المبدع رفعت السنوسى يكتب قصيدة ( صفصافة )
……………………..
عشقتك روح وحِنِية
يا شجرة توت مِنَدِيَة
يا وردة حب فوّاحه
يا شمس وساكنة في عينيا
يا وش الخير يا صفصافه
يانسمة عشق هفهافة
يا نجمة منورة الدنيا
يا قمره ف ليلي طوافه
هوى حُبِكْ يقوِّينى
وشوق القلب يِحيينى
حنان قلبك بيسندني
ويحضني .. يداوينى
اشوف الليل سواد نِنْك
ومنه النظرة تكفيني
اتوه مني واتوه منك
ورمش عنيكى يهدينى
يصاحبنى في بحر الشوق
ولو مرة اكون مخنوق
يلاغيني أعوم وِأفوق
و ياخدنى هواكي لفوق
أطير وألِف بجناحى
وجوَّانا الهوى صاحى
يطير ويغنى ويانا
نبات ونجومنا صبَّاحى
عشقتك راحة لشقايا
يا عايشة بقلبي جوايا
أعيش فيكي واناديكي
يا كلمة ولحن لغُنَايا
يا شجرة وقايمه ع الميه
تشوفها تقول دي جِنِية
بشوق الحب تندهلي
يا نخلة بخيرها محنيه
باشوفك سِكَة وشوارع
يا ضِلِة عِنَبَه ومزارع
وبالقاكي ف خريف روحي
تضميني وانا ضايع
ولو ليٌا ف هواكي نصيب
راجع ليكي ومهما هاغيب
راجع والقلب مليان شوق
دا بحر الحب أمره عجيب
وموج الشوق يدوبنا
نلاقي الحب مكتوبنا
ومينا ونور لمركبنا
و نغزل بالحنين توبنا
دا حبك تاج على جبينى
وحسنك ضِي لعيونى
وصوتك غنوة صداحة
يا أجمل حب في سنينى
تعالي وازرعي كلمة
بِروح الحب في صدورنا
تِنَبِت شمس في الضلمة
وِتِروِي بالهوى جدورنا
………… الأديب رفعت السنوسي