احنا اغلب خلق الله
وكل المظاهر كدابه
عايشين ورزقنا على الله
فى دنيا دواره وقلابه
لا بترحم اللى اغتنا
ولا بتحن على فقير
كل اللى بييجى دوره
مجرد ثوانى وبيطير
اسمعها منى نصيحه
وبلاش تعمل كبير
دورك جى جى
مهما كان التأخير
مفيش عليها حى
فى الاول والاخير
لو صورك ع الحيطان
وليك فى الميادين تماثيل
صدقنى دى وزة شيطان
غاوى رقص وغنى وتمثيل
الدنيا هتلف بيك
وترسا على مفيش
وييجى يوم عليك
يمحوا اسمك م الأفيش
هتلاقى نفسك مجرد
ذكرى محدش فاكرها
هتحس انك مشرد
ف ياريت دلوقتى تذاكرها
لو ضاحكالك النهارده
صدقنى هتضحك عليك
دى لو قدمتلك ورده
اكيد هتجرح ايديك
سيناريوا الدنيا عجيب
كل اللى فيه اموات
مكتوب ع الكل يغيب
ويبقى من الذكريات
ياريت تعيشها وتحسبها
قبل فوات الاوان
انا عن نفسى هسيبها
لكن هسيبها انسان
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com