كتبت ناريمان حسن
من أسمى علاقات الحب اللي شفتها من خلال شغلي، علاقة الأب بإبنته والبنت بأبيها ..
علاقة لما بتكون قوية بتبقى آسرة من جمالها ورقتها، حب البنت لأبيها وخوفها عليه وقلقها على مرضه وسؤالها عن تفاصيل صحته وإزاي تقدر ترعاه وتاخد بالها منه وإيه اللي يخوفها وامتى تطلب المساعدة، دموعها وقلقها اللي بيصرخ مع كل حرف بتنطقه وكل سؤال بتسأله، خوفها طول ما هي بتتكلم معاك عن حالته اللي بيتحول لابتسامة طمأنة جميلة أول ما تشوفه وتطبطب عليه طبطبة حانية وهي بتوصلله إن كل حاجة كويسة وإن صحته ممتازة، دعواتها اللي مبتنقطعش إن ربنا يحفظهلها وألا ترى فيه ما يحزنها ..
علاقة الأب بإبنته، الأب اللي تحس إنه بيقتطع من قلبه علشان يرضيها، حب وخوف وحنية مهما كان في حياته العادية جامد أو صلب أو يبان إنه بلا عاطفة، قلقه عليها إذا مسها أي مرض ولو يبان بسيط، بيسيب حياته وشغله وتفكيره في أي حاجة وتلاقيه مش قادر ينام أو ياكل أو يفكر في أي حاجة غير بنته، تلاقيها تجاوزت العشرين أو أكتر بس في نظره هي طفلة متقدرش تعمل حاجة من غيره، لما تتحجز في المستشفى يفضل واقف جنب سريرها رافض حتى إنه يقعد، ماسك إيدها وبيطمنها وبيضحكلها بالرغم إن القلق بيقتله، لما يختلي بيك كدكتور علشان يطمن منك عليها تلاقي الصرامة اللي كانت على وشه بتنهار ودموعه بتنزل ولا كأنه طفل هيتوه من غير أمه، بتبقى بنته هي دنيته وحياته ومش قادر يشوف ولا يعيش أي لحظة من غيرها نوعين من أرقى أنواع الحب اللي ممكن تشوفهم في حياتك
التعليقات