إدخليني .. بقلم:- عادل عبد الرازق

إدخليني
إتملّكيني
أملكيني
إتسرسبي جوّايا
إفتحي كل مياديني
واعشقيني
زي مابعشقك .. إعشفيني
سرّك قتلني وقاتلني
والجرح مفتوح وانتي ..
بتتمرجحي على أضعف وتر
.. وبتجرحيني
موت وباموت
صمت وسكوت
وبدون بيوت
وشّك أنا مش قادر افهمه
هل ضريح ولي
… ولاّ تابوت
أرجوكي يا حبيبتي
أرجوكي تفهمّيني
…
كنتي طفلة صغيّرة
وبتحجل على ناصية الحارة
فين راحت ضحكتها
واتحوّلت ليه مرارة
يا خسارة
ويا ألف مليون خسارة
وكبرتي إنتي
وكبرت انا
وافترقنا عن بعضنا
مافتكرش بيدّنا
ولا كان غصب عننا
ودلوقتي راجعة تاني
بتدوّري فين أحضاني
لكن غموضك مستمرّ
ماعرفش ناويالي خير
… ولاّ شر
بتقبليني
وبترفضيني
بتقرّبيني
وبتبعديني
إدخليني
وزيّ ما بعشقك ..
… إعشقيني
بس الأول ..
… إدخليني