علق محمد عبد الوهاب عضو مجلس إدارة النادى الأهلي، على إساءة المعلق أحمد الطيب، قائلًا: “أنا معرفش مين ده، لأنى معرفش معلقين من الجدد، لكن أنا ضد أى معلق ينحاز للأهلى أو للزمالك، ولو بتعلق ما تجبش سيرة الأهلى على لسانك، وماحدش يقدر يمنعك من أنك تحب فى الزمالك لـ100 سنة، لكن ماتجبش سيرة الأهلى، وده اللى إحنا عايزينه، ونفس النظام مع الأهلي”.
وكانت الساعات الماضية، قد شهدت أزمة كبرى بسبب سخرية أحمد الطيب من الأهلى وجماهيره خلال تعليقه على مباراة الزمالك وإنبى الخميس، حيث قال إن جمهور الأهلى يضم عبد الباسط حمودة وسعد الصغير، بينما يُشجع الزمالك عمرو دياب ومحمد منير وهانى شاكر، وتسبب هذا فى هجوم أحمد شوبير ضده ليتم إيقافهما لنهاية الموسم الكروى الحالى ومنعهما من الظهور على القناة.
أضاف عبد الوهاب، خلال تصريحاته لبرنامج “الكرة فى دريم” قائلًا: “ليه رجعنا موضة مين أهلاوى ومين زملكاوى، زمان كنا بنلعب مع مطربين زملكاوية والأمر عادى جدًا، ومع احترامى للناس كلها أنا المعلقين عندى من أيام الكابتن لطيف، ومحمود بكر، وشوبير ومدحت شلبى، والشوالى والناس دى، لكن معرفش حد من الناس الجديدة، اللى بتطلع تستظرف وتقولك مش عارف المطرب مين أهلاوى ومين زملكاوى، وأنك زملكاوى دى حاجة مش عيب وانتمى للنادى اللى بتحبه من غير ما تجيب سيرة الأهلى على لسانك”.