الدمعات بقلم – عادل عمران

لمّا اتقابلنا بغد سنين
واترسمت بين عيونّا الدمعات
لقينا في عينينا الصور
واتولد فينا كل اللي مات
بدايتنا الجميلة
مشاويرنا الطويلة
والنهاية المستحيلة
وكل كل الذكريات
لمّا افترقنا
أنا وانتي وغرقنا
ما بين الموج والدوّامات
في بحر الصمت والسكات
ما قدرناش نمدّ ف طريقنا إيدينا
ولا فسرنا عناوين الشوارع والمدينة
وقبلنا كل أسوارنا حوالينا
ورضينا بالأوجاع والآهات
والحلم ضاع
بكلمة وداع
من غير خداع
قالتها شفايفنا الحزينة
وفارقني طيفك وفات
وانجرح أمسنا
واندبح حسنا
إنتي وانا
كنا أضعف من نفسنا
ومن كل كل الحاجات
لما اتقابلنا بعد سنين
واترسمت بين عيونا الذكريات
صور الماضي فكّرتنا
إتخنقت في عينينا الدمعات
***