متابعة/حامد خليفة
حوالي الساعة السادسة مساء حضر النائب الهامي عجينة الي المستشفى و حينما وصل كان في المستشفي المدير المناوب ونائب المدير ثم وصل مدير المستشفى .
وكان حضور النائب من اجل حالة محجوزة في قسم الباطنة .
وللعلم المريض من مركز بلقاس محل اقامة النائب وحضر الى مستشفى شربين بالامس الساعة العاشرة مساءا وتم التعامل مع الحالة وعمل اللازم لها كما هو مثبت بتذكرة المريض وكان المريض يتم تهيئته للتحويل لعمل اشعة مقطعية .
ولكن النائب الهامي عجينة قام بالتعدي على الفريق الطبي بالمستشفى وتم نشر فيديو من خلال سيادته يقوم فيها باتهام مستشفى شربين باتهامات باطلة وبطلانها يظهر في الفيديو الذي قام النائب بنشره بنفسه وهي كالاتي :-
اولا :- بيقول ان مفيش مدير مع ان اول من قابله ف الفيديو هو المدير المناوب عن الفترة المسائية وتكلم معه ولكن النائب تكلم مع الطبيب باسلوب غير لائق لايتحمله طبيب في ظروف وضغوط كالتي تعيشها المستشفيات الان وهذا يظهر في الفيديو المعروض.
ثانيا :- بيقول مفيش اطباء ..و من شاهد الفيديو يرى اكثر من طبيب ما بين طبيب العظام وطبيب الجراحة وطبيب الاطفال ودول كانوا ف الفيديو وكانوا موجودين ف الاستقبال ..
دا غير الاطباء الاخرين اللي ظهروا ف الفيديو دا غير اللي ف الاقسام فوق .
ثالثا :- بيقول مفيش تمريض واظن ان الفيديو بتاع النائب نفسه ظهر فيه العديد من التمريض في اماكنهم في غرف الاستقبال وقسم الباطنة وفريق الفرز على بوابة المستشفى دا غير بقية الاقسام.
ربعا :- بيقول مفيش نظافة … وانا اريد اي احد شاهد الفيديو برضه بتاع النائب يقول فين في الفيديو مظاهر عدم النظافة بل كل الاماكن اللي كانت ف الفيديو كانت نظيفه ارضيات وخلافه.
خامسا :- بيقول مفيش صيادلة … يافندم حضرتك جاي الساعة ٦ مساءا يعني مفيش صيدلية بتشتغل بعد الساعة ٢ ظهرا ودا الرسمي ومش ذنبنا ان حضرتك مش فاهم النظام داخل المستشفيات .
سادسا :- بيقول بنك الدم مقفول … طبعا اي متردد على مستشفى شربين هيعرف ان الباب اللي النائب بيشاور عليه دا الباب الخلفي لبنك الدم من ناحية العيادات ودا مقفول لكن العمل كله من الباب الامامي ودا كان مفتوح وشغال … لكن طبعا عشان حضرتك دي اول زيارة ليك لمستشفى شربين فمتعرفش اللي فيها.
سابعا :- بيقول ان الناس بتشتري الجبس من بره …يافندم الجبس دا انواع واحيانا المريض بيختار نوع جبس ليس الموجود بالاستقبال والمتوفر من خلال المديرية وبالتالي من حقه انه يجيبه واحنا نجبسه .
ثامنا :- بيقول ان الدكاترة رافضة ان سيادته يصور تذكرة المريض …. ايوه يافندم بنمتنع عن تصويرها لان دي خصوصية مريض وتصويرها ضد القانون .
في النهاية ..كنا نتمنى كفريق طبي بمستشفى شربين في ظل هذه الظروف الصعبة التي تواجها البلاد عامة والفرق الطبية بكل مكان خاصة ان يكون هناك دعم من سيادة النائب بدلا من هذا الاسلوب من التصيد والكلام بشكل عنيف ولا يليق مع الفريق الطبي .
ياسيادة النائب دورك ان تقف في ضهر الجيش الابيض كما تقول وليس ان تعامل افراده بهذه الطريقة الفظة العنيفة.
ياسيادة النائب هذه المستشفى اللي حضرتك بتقول انها فاشلة في خلال اقل من سنة ونصف :-
١-انشاء عناية اطفال قوتها ٩ سراير تلت قوة عناية الاطفال بالمحافظة
٢- انشاء وحدة علاج الفيروسات الكبدية وتم التعامل مع اكثر من ٥٠٠٠ مريض
٣- انشاء معمل حيوي متكامل .
٤-تجديد قسم الاطفال بالكامل .
٥-تجديد قسم الباطنة بالكامل
٦- وحدة غسيل كلوي جديدة تسع حتى ٥٠ ماكينة غسيل كلوي (تحت الانشاء)
دا غير البروتوكولات اللي من خلالها بيتم التعامل مع حالات اشتباه الكرونا وخطوط سير الحالات والتعامل معها واللي مستشفى شربين تعتبر من اوائل المستشفيات في تنفيذها وتطبيقها .
هذه هي مستشفى شربين وادارتها و كوادرها الطبيه التي تصفهم بالفشلة .
الانصاف ياسيادة النائب .
التعليقات