عيونك …
مش عيون زمان
مرسومة ليه أحزان
في بحورهم سابح المستحيل
والحزن تراحيل
عيونك تراحيل
…
ماشية الدروب بتدوب
تعشق وتندم ولا بتتوب
حكاوي وعشتيها
غناوي وغنتيها
ونهايتك دايماً هروب
عيونك …
مش عيون زمان
مرسومة ليه أحزان
…
عمل إيه فيهم الزمن
غيّرتهم ليه السنيين
ماعادش ليهم في الحب وطن
ولا ذكرى ولا حنيين
سماهم الصافية غيّمت
ودروبهم الواضحة ضلّمت
والأحلام الجميلة ..
تاهت واتبددت
إتغيّرت كل معانيكي
إتغير كل ما فيكي
شرود وعايشاه
مجهول وماشياه
رحيل وعاشقاه
واللي راح راح
واللي كان كان
كل شىء انتهى
من أوان قبل الآوان
عيونك …
مش عيون زمان
مرسومة ليه أحزان
…
ماشية مابين الجموع
ناسية طريق الرجوع
كل يوم طريق
كل يوم حريق
وفي كل نهاية دموع
عيونك …
مش عيون زمان
مرسومة ليه أحزان
…
توهة بين الوصول والرجوع
والحقيقة والخيال
بتبكي بصوت مش مسموع
في مداين المحال
دنيا ولعبت بيكي
جرحت قلبك وإيديكي
رسمت توهة حواليكي
وطفّت كل القناديل
زمن وحدك معاه
جرحك ودارة دواه
مشّاكي على هواه
واتاري زمانك بخيل
عيونك …
مش عيون زمان
مرسومة ليه أحزان
في بحورهم سابح المستحيل
والخطوة تراحيل
عيونك تراحيل
…
سابحة في بحولر الضياع
وقصة حب مستحيل
ونلف بلاد وبلاد
ونمشي الدرب الطويل
وعد ومكتوب
تتقابل قلوب
بالحلم تترسم
ويلونها الغروب
والحطاوي أخرتها إيه
والغناوي حزينة ليه
والطريق ليه نمشيه
ما دام في آخره ليل
وبتجري تاني
وبتحلمي تاني
وتبكي تاني
وتعيشي تاني الرحيل
عيونك …
مش عيون زمان
مرسومة ليه أحزان
…
وانا ويّاكي موجوج
لكن مانيش موجود
وانا وانتي بينا وعود
لكن ما بينا سدود
وأسوار وحيطان وجدران
عيونك …
مش عيون زمان
مرسومة لون ا لأحزان
وانا تايه في اللون
والتوهة تراحيل
وعيونك تراحيل
***
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com