إنتي ..
مش إنتي بالمرًة
مش إنتي
مين سلخ الوجه وغيًر معانيه
مين قص شفايفك منك
والأنف الإيزيسي العالي المتكبر
إزاي مكفي على الأرض بيبكي
أنا اصدق إن الشمس ما تشرقشي
ولا اصدق إن ملامحك تتغير
دلوقتي انا شايفك أحزان
وغناوي حروفها بتتحسر
تكوينك ..
متغيًر تكوينك
وايامك ..
تايهة في سنينك
وعيونك مقطوعة جسورها ..
مش قادرة تنور قناديل
كل مداينك صبحت عتمة
ومداينك كانت ..
مشهورة بنور قناديلك
صمت الليل لافف الشارع
بعباية حزن ومتحني
ومتخبي لكن متشجر
في الناصية اللي ف أخر الشارع
واقفة الطفلة بجانب حيطة
ترسم عالحيطة وتكتب
إن أوزوريس كان بيغني
بس إيزيس رفضت غناويه
في الشارع ماشية الطفلة
تحجل عالأرصفة المكسورة
بتندن غنوة قديمة
لكن خايفة من العفاريت
شباك البيت قدامها مفتوح
وانا تعجبني الشبابيك المفتوحة
بس المفتوح مفتوح للريح
بيعدي على الصالة والسطح
.. كان واقف قلبي هناك
ماسك دفتر
بيبص لوجهك وبيكتب أشعاره
ويشم ملامحك يتعطر
إمبارح كنتي وكني
إمبارح كنا وكان
ياريت يا حبيبتي نعود
أنا وانتي زي زمان
لسه باحبك رغم بعادك
لسه بحبك رغم صدودك
أنا عاشقك ..
ولا يمكن عشقي لقلبك يتفير