«يعنى هو ده يرضى الرحمن يا ناس؟».. سؤال ظل معلقاً على شفاه كل من حضر المشهد، 3 حمير مذبوحة تخرج من شادر ضخم لمائدة رحمن جديدة بمنطقة كرداسة، وأوان تحمل لحوماً فاسدة، ألوانها غريبة وباهتة، ما دفع الأهالى للشك فى كل موائد الرحمن المقامة فى المنطقة أو خارجها.
الأهالى بعد إغلاقها: «كانت زحمة.. والناس بتاكل مبسوطة»
حالة من الذعر والقلق شعر بها «مصطفى مجدى»، أحد أهالى كرداسة، بعد رؤيته حملة مضبوطات لحوم فاسدة وإخراج حمير من شادر مائدة رحمن بالمنطقة، يقول: «أول مرة أشوف منظر اللحوم المعفنة بعينى، طول الوقت بسمع أخبار عن لحوم فاسدة وحمير وكلاب بتبيعها المحلات، بس عمرى ما تخيلت إنها تطلع من مائدة رحمن المفروض إنها بتعمل خير وبتأكل غلابة»، متسائلاً: «هو الضمير فين؟».
الحمير التى شاهدها الرجل الخمسينى وجيرانه وهى تخرج من شادر المائدة، ساهمت فى مزيد من القلق.. «3 حمير خرجت قدام عيوننا ومش عارفين كانت فين ولا مصيرها إيه؟، لقينا حملة بعربيات ربع نقل فى عز الضهر بتخرج لحوم لونها سودة وريحتها قذرة، ومش عارفين دى فعلاً اللحوم اللى بيأكلوا بيها الغلابة، لأنها مائدة جديدة ومحدش حتى عارف صاحبها مين لحد دلوقتى».
أعداد ضخمة من فقراء المنطقة كان يراها «مصطفى» يومياً تأكل بسعادة، مؤكداً: «فيه ناس كتير أكلت من المائدة دى طوال الـ14 يوم من أول رمضان، لكن ما سمعناش عن أى حالات تسمم، وعلى طول كانت زحمة والناس بتاكل فيها، لكن الحمير واللحوم الغريبة اللى خرجت منها مش طبيعية»، من جهته، رفض محمد مجدى، نائب رئيس حى كرداسة، الحديث أو التعليق، مكتفياً بالتأكيد أن المائدة الجديدة فى المنطقة أُغلقت، بقرار من الحملات البيطرية.
المصدر :- الوطن
التعليقات