وبعد الفرقة حنتقابل
أنا وانتي موجة وشطآن
وأقولك إن انا قابل
أشوفك رغم كل ما كان
ألاقي عيونك بتتصوّر
صدر يحضن حرفي
والاقي حروفك بتتنتور
وتتبعتر على طرفي
تقرّب بينا خطاوينا
تجمّعنا .. تنسّينا
في دوّامة من الأحضان
وبعد الفرقة حنتقابل
أنا وانتي موجة وشطآن
…
حننسى كل ماضينا
ونتكلم سوا عن بكره
ونغفر كل خطايانا
ونتسامح كمان مرّه
تسافر كل أحزانا
تهاجر دمعة في عيونا
ونرسم ضحكة وحكاية
بتعشقنا ولا بتخون
على صفصافك وصفصافي
في أوصافك وأوصافي
ونتمايل مع الأغصان
وبعد الفرقة حنتقابل
أنا وانتي موجة وشطآن
…
زحام الدنيا حياخدنا
لكن نوصل بأشواقنا
ولا الكون حيبعدنا
ولا العالم يفرّقنا
ونرسم سوا مشاوير
وسكّة تكون لينا
ونجمع سوا أحلامنا
نكمّلها مع بعضينا
وأحلامنا تحلمنا
تصوّرنا وترسمنا
مراكب راجعة للأوطان
وبعد الفرقة حنتقابل
أنا وانتي موجة وشطآن
***
التعليقات