على باب الشارع الضلمة
ركنت قلبي فوق جدار
وبنت واقفة بعيد
بتتفرج عليك وانت حزين
ولأول مرّة ما تتمناش
طفل بيرسم أحلام
عند أخر بيت في الشارع
إتعترت فوق الأرض الأيام
…
ما تتمشاش على جرحي
ولا تعشق حزني على امبارح
وما تسألنيش ليه لمّا باصلّي
دايماً قلبي بيكون سارح
عصفور ضرير فوق شجر
ما عرفش إنه فوق شجر
حاعشقك رغم الإختلاف
واحضنك حتى لو تحت المطر
…
من صغري وانا عاشق أتوب
لكن الذنوب مدا وسكات
كل الحروف اتهجّرت
لما حاولت اشتهجى إسمك
وامّا وشوش البيوت اتحنت بالحزن
أنا قلبي اتحنى بالذكريات
…
قبل اللهجة الأولى اتجتني
بس حروفي مرّه في شفايفك
باب البيت كان يعرفني
وانا باب بيتي كان عارفك
يا حبيبي ودايماً يا حبيبي
أنا خايف ريحك وعواصفك
…
أنا ماعرفش ازاي توهنا
قبل ما شفايفك تحفظ إسمي
أنا ماعرفش ازاي توهنا
وانت حبك ساري ف دمّي
وباحبك وبتعشقني
وابعد وترجّعني
بس العشق ما بينا علامات إستفهام
***