قرصة ودن ياعالم.. حد فاهم حاجة! .. بقلم/ مجدي فتح الله

عندنا في الفلكور الشعبي نكتة بتقول اتنين بلدياتنا بيلعبوا شطرنج الأول قتل للتانى الحصان قام التانى خارج وراح سممله البهايم
عدة أحداث متتابعة شغلت الرأي العام المصري هذه الأيام وكلها وللأسف محزنة وكانت بدايتها بجنوح السفينة البنمية إيفر جيفن بقناة السويس مما أدى لتوقف حركة الملاحة بالقناة تماما وبالتالي التأثير علي حركة التجارة المتعلقة بالنقل البحري في العالم كله، وحادثة قطاري سوهاج مما أدى لوفاة ٣٢ وإصابة ١٦٥، وإنهيار كوبري ترسا، وحريق تاكسي نفق الأزهر، وحريق نفق عرابي، وحريق فندق بالأسكندرية، وانهيار عمارة جسر السويس، لكن الحدث الأول والمتعلق بجنوح السفينة إيفر جيفن بمجري قناة السويس مما أدى إلي اغلاق ممر القناة من الجهتين فخرج الحدث من المحلية وانتقل إلي العالمية وأصبح محط أنظار العالم كله، فوفقا لتقرير أصدرته وكالة ” بلومبرغ” الأمريكية فإن تعطل الملاحة بقناة السويس والتي تمثل ١٢٪ من التجارة العالمية و ٢٤٪من إجمالي عبور الحاويات في العالم أجمع، يكلف هذه التجارة قرابة ٤٠٠ مليون دولار في الساعة الواحدة أي ما يعادل نحو ٦،٦٦ ملايين دولار في الدقيقة، ولمن لا يعرف فإن قناة السويس مقارنة بالطرق البحرية والملاحية الأخري كطريق رأس الرجاء الصالح علي سبيل المثال فقناة السويس نسبة الحوادث فيها تكاد تكون منعدمة مقارنةً بهم جميعا، هذا غير أن حركة الملاحة بها تعمل ٢٤ ساعة أي ليل ونهار وبدون توقف، وتوجد ميزة مهمة لقناة السويس فهي مهيأة في أي وقت للتوسيع والتعميق أي بعد هذه الحادثة سيكون التفكير الجدي من قبل القيادة السياسية ” إذا أرادوا ” أن يعملوا علي هذا المقترح، حيث أن عرض السفينة البالغ ٦٠ متر وحمولتها الزائدة عن ٢٢٠ ألف طن بنسبة أو بعدد ٢٠ ألف حاوية علي ظهرها مرت من مجري أو نقطة مائية بالقناة يبلغ عرضها ٢٥٠ مترا، وهذا مقارنة بعرض السفينة البالغ ٤٠٠ متر أي بطول ناطحة سحاب إذن فالفارق ١٥٠ مترا توسعة سيكون لها ابلغ الأثر في المستقبل القريب، لكن هذا ليس موضوعنا الآن والكلمات القادمة هي الأهم من كل هذا.
فلأهمية قناة السويس عالمياً من أنها تعتبر أقصر طريق تجاري يربط بين أوروبا وآسيا، فهي بذلك توفر ٢٣٪ ممن يسلك الطريق البديل لها والمعروف للعالم القديم بطريق رأس الرجاء الصالح أي آلاف من الأميال البحرية وبالتالي توفير هذه الملايين من الدولارات التي خسرها الاقتصاد وحركة التجارة في العالم أجمع في كل ساعة مرت بسبب هذا التوقف في المجري الملاحي للقناة، ولقد تأثرت وزادت أغلب المنتجات الاستراتيجية والتي لا تستغني عنها أغلب دول العالم المستوردة لهذه السلع ومن أهمها منتجات الغاز والبترول ( ٨٥٪ من النفط ” غاز وبترول” المُصدر الي أوروبا عن طريق قناة السويس ) والتي ارتفعت أسعارهما بنسبة ٤٪ مما كان له أبلغ الأثر بالإرتفاع في جميع السلع والمنتجات الأخري، ومن لا يعلم أنه في العام الماضي وحده مر بالقناة أو عن طريقها بضائع تزن مليار و١٧٠ مليون طن كانوا علي متن ١٩ ألف سفينة مروا بالقناة …، وكل ما طرحناه كان من الناحية الاقتصادية وهذا لا يعنينا الآن بشئ رغم أن أحدهم سيقول لي إنت بتقول إيه وانت عارف القناة بتدَّخل أو بتضخ للإقتصاد المصري كام مليار كل عام، هقوله عارف ستة مليارات دولار كل سنة، وهقولهم انا بتكلم وعارف بقول إيه، القناة الآن أصبحت من الناحية الإقتصادية في الوقت الحالي لاتعنيني بشئ ولا يعنيني دخلها وممكن أجيب درفها من الصبح إذا كنتم حابين، والناس المتخوفة وطالعة تشتم في دولة الإمارات الشقيقة ومن تعاونها مع الكيان الصهيوني من ربط ميناء جبل علي بطريق بري أو خط سكة حديد أو حفر قناة حتي ميناء حيفا بإسرائيل أقوله كل هذه المخاوف تركنها علي جنب دلوقتي ولما يتنفذ المشروع علي أكمل وجه يبقي ساعتها نبدي مخاوفنا، دلوقتي انا معايا كارت أقدر ألعب بيه كل دول العالم وبالأخص منها اللي بتجاهرني العداء صراحةً مش اقتصاديا بس لا سياسياً، يعني إيه الكلام دا أقولك ياسيدي ما هو أنت لو شغلت دماغك شوية زي جهاز المخابرات بتاعك واللي يصنف من أقوي الأجهزة المخابراتية علي مستوي العالم كنت عرفت إن موضوع السفينة ممكن يكون احنا بذات نفسنا لينا يد في الموضوع !!!
إزاي ياجدع؟!
أقولك ياسيدي في شوية ناس ولا وسخة وهما مصريين ومش مصريين في نفس الوقت مأجورين هريانين برة مصر ومبيحبوش البلد دي وعمر انتماؤهم ما كان ليها من الأساس أصلهم شوية إخوان خونة طلعوا علي قنوات مخصصة للهجوم علي بلدهم وكانت طبعا الشماتة واضحة في كلامهم وقالوا كلام ولا له أي لازمة بالموضوع بس اللي لفت نظري وكانوا صادقين فيه هو أن أول قبطانة مصرية ( مروة السلحدار ) هي اللي كانت بتسوق وبتوجه دفة السفينة داخل المجري الملاحي للقناة والكلام دا صحيح ( من وجهة النظر اللي بطرحها ) وإن موضوع وسائل الإعلام الأجنبية اللي وجهت سؤال لقائد السفينة وكان مضمونه ” هو أنت ليه درت بالسفينة حوالين نفسك أكثر من مرة لدرجة إنك رسمت شكل ( عضو تناسلي ) وبعدها دخلت ممر القناة ؟! فكان رده اللي حصل دا كان مجرد صدفة، وإن المركب نفسها بتعاني من أعطال كهربائية تؤدي لإنقطاع الكهرباء بشكل متكرر لكن علي فترات طويلة وهو دا اللي خلي المركب أو السفينة تجنح بالعرض واقفلت المجري الملاحي، وخدوا دي كمان عارفين موضوع أو حادثة السفينة دي سنة ٢٠١٩ ودخلت في رصيف من أرصفة أحد الموانئ في ألمانيا عامل أو مشابه تماما لموضوع أو العميل ( العراف) واللي فاهم يفهم.
نرجع للنقطة الهامة اللي طرحناها، هو ممكن يكون احنا بذات نفسنا لينا يد في الموضوع !!! أيوه والله ممكن ودا لما يكون أو عاوزين نستغل موضوع يخص ويخض العالم كله ويكون متعلق بإقتصاد دول وارتفاع اسعار وانهيار دول وكيانات اقتصادية وكل دا وتربطه بموضوع محلي يخص أمننا المائي يبقي لازم نلعب بحرفية، أظن كده في ناس إبتدت تفهم أنا قصدي إيه.
أوضح أكثر .. بص ياسيدي يوجد ممر مائي يربط بين ١٠ دول وطوله ٦٦٥٠ كم والممر دا موازي لمياه البحر الأحمر في الجهة الجنوبية من الجانب الشمالي الجنوبي للقارة الأفريقية والممر دا اسمه ( نهر النيل ) شريان الحياة للمصريين يجري مع دمائهم وداخل أراضيهم بطول ١٥٣٠ كم واللي بيمثل حياة أو موت ليهم، وفي دولة من الدول اللي مشتركة في ممر النهر أقامت سد وأسمته سد النهضة بتفكير وتمويل شيطاني من كيانات ودول لا تحب الخير لنا وكل هدفها تركيع وموت الدولة المصرية اللي لغيط دلوقتي بتستخدم أعلي درجات ضبط النفس، يبقي ساعتها نبتدي نلعب بورقنا ونوري أهميتنا وقوتنا الحقيقية للعالم كله وبالأخص كيانات الشر اللي بتلعب وبتوجه في الخفاء دفة اللعبة نحونا ونقولهم ( والله أنتم بأنفسكم اللي هتحلولنا المشكل دا وبإيديكم هتجيبوا السد عاليه واطيه وإحنا المصريين حاطين رِجل علي رِجل وبدون ما نتهور ونضرب طلقة واحدة علي السد) إيه رأيكم، واللي متابع كويس يشوف الإتصال اللي تم بالأمس بين الرئيس السيسي وهو يؤكد لـ”ماكرون” الرئيس الفرنسي اللي شكله فهم الفولة أو قولوا مخابرات بلده نبهته للأضرار الجسيمة مستقبلا واللي ممكن مصر تعملها، وقد شدد وأكد ونبه الرئيس السيسي من أن مصر والمصريين يولون قضية سد النهضة أقصى اهتمام فى إطار الدفاع عن حقوقنا التاريخية فى مياه النيل وكذا التوصل إلى اتفاق قانونى شامل وملزم لإثيوبيا بشأن قواعد ملء وتشغيل السد، ، لا ومش كده وبس دا قالهم حاجة كمان لو هما ناويين يشتتوا تفكيرنا عن قضيتنا التي نوليها أشد الإهتمام وهي بالنسبة لنا حياة أو موت من ضرورة إخلاء ليبيا من المرتزقة وتقويض التدخلات الأجنبية غير المشروعة فى الشأن الليبي.. ” يبقي اللي يتهور يتعور ” ودي مصالح يابا واقتصاديات دول، وبالشكل أو بالمعني دا أو من خلال العملية دي نقدر نقول إطمنوا يامصريين محدش هيقدر يلوي دراعنا ولا يقدروا يملوا السد في شهر يونيه اللي جاي، وإن بشروطنا وإملاءاتنا وقراراتنا اللي هنفرضها عليهم هنطلع احنا الفائزين وبمكاسب جمة وأكثر من اللي كنا بنتوقعها. فهمتوا بقي قيمة الأمثال الشعبية، وإن من الممكن اللعبة اللي بتتلعب عن طريق نقل القطع في لعبة الشطرنج ممكن تتنقل للواقع .. هو يموتلي الحصان قوم أنا بمخي المصري الجدع والذي يهابني الجميع ويحسبون لتحركاتي ألف حساب وأموت ليهم البهائم.. والحدق يفهم بقي.. والسلام عليكم . لأ إستنوا في كلمتين حلوين ريسنا قالهم بعد إنتهاء أزمة السفينة وتعزيزها بنجاح.. اقرأوا قال إيه :”لقد نجح المصريون اليوم في إنهاء أزمة السفينة الجانحة بقناة السويس رغم التعقيد الفني الهائل الذي أحاط بهذه العملية من كل جانب. وبإعادة الأمور لمسارها الطبيعي، بأيد مصرية، يطمئن العالم أجمع على مسار بضائعه واحتياجاته التي يمررها عبر هذا الشريان الملاحي المحوري.وإنني أتوجه بالشكر لكل مصري مخلص ساهم فنيا وعمليا في إنهاء هذه الأزمة. “‏ولقد أثبت المصريون اليوم أنهم على قدر المسؤولية دوما، وأن القناة التي حفروها بأجساد أجدادهم ودافعوا عن حق مصر فيها بأرواح آبائهم.. ستظل شاهدا أن الإرادة المصرية ستمضي إلى حيث يقرر المصريون، وسلاما يا بلادي ”