حتعرفيني .. بقلم / عادل عبد الرازق

حتعرفيني
بعد ما يدور الزمان
وتتغيّر الوشوش والملامح
والبيوت
والجدران
حتعرفيني
وحتشوفيني في كل مكان
الشوارع
والطرقات
وفي نن عيونك
وفي الأحضان
في السراب اللي ممكن يكون
وفي خيوط الدخان
في شرفات البيوت
والشبابيك
وقدّام كل البيان
في أفراح الناس
وفي الأحزان
حتشوفيني في كل اللي جيّ
وكل اللي كان
ما بين الموج والدوّامات
وعلى رمال الشطآن
مرسوم في الغيوم
موجود في الغروب
وفي الليل البردان
لحظة شروق الشمس
ولحظة صوت الأدان
أنا موجود
في كل الزوايا
وأواخر المداين
والأركان
حتشوفيني
وحتعرفيني
وتقولي كان ياما كان
أنا اللي جايلك من سنين
من زمان
غير الزمان
أنا حبك وحبيبك القديم
اللي عشقك
وعمره ما خان
أنا ورداتك وغنواتك
وفراشاتك والألحان
موانيكي وأسفارك
وكل المدن والبلدان
أنا اللي فتحتلك قلبي
أوطان وأوطان
واحتويتك من ضياعك
ومن ماضيكي الخوّان
وكتبتلك صفحة جديدة
وكتبت إسمك
على سطر العنوان
عرفتيني
ولا لسه
ولا واخدك النسيان
خدي وقتك
فكرّي كمان
وكمان وكمان
حتعرفيني
وتفتكري إنك كنتي خاينة
وانا كونتلك إنسان