عيونك مسافرة
في الدروب
في الغروب
وقمر اللؤاه بدأ الرحيل
بيمسي على أحزان البيوت
والسكوت
هوًه اللي بيني وبينك لحظة وداع
ولاَ اللي بيني وبينك غدر الزمان
…
جوًاكي حاسس بالندم ماعرفش ليه
ندمانة على إيه واحنا بنفترق
على قلبي اللي ضاع ولاً قلبك
ولاً عشان غصب عنا وصلنا المفترق
هل كان باختيارنا
ولاّ نصيبنا وقدرنا
ولاّ احنا صدقنا احلامنا
والحلم يا حبيبتي باع وخان
…
عيونك مسافرة
في الشوارع
في اللي رايح واللي راجع
في الذكريات اللي مرمية خلف البيوت
في الطريق اللي مات واندفن
قوليلي كان إيه التمن
ولاً ضعنا من غير تمن
عيونك تايهة وحايرة
لاهى ناسية ولا فاكرة
ولا قادرة ولا مش قادرة
وكتيرة ما بينا الحيطان
…
يا حبيبتي ماهو إنتي عشتي تكسريني
ولا أحضنك غير لما تبعديني
تجمعنا أيام المخاوف
تحضنا أوقات الغضب
ماهو قلبي كان زهوًر ..
وانتي اللي قلبك كان عطب
ماعرفش ليه ما فهمتنيش
ماعرفش ليه ما حستنيش
ماعرفش ليه ما همّكيش
إن قلبي فتحلك البيبان
وانتي قفلتي كل البيبان
…
عيونك مسافرة
في الذكريات
واللي فات
وكل كل الحاجات
بتفكري
وبتندمي
وتحاولي تداري الدمعات
عيونك مسافرة
كفاية يا حبيبتي سفر
إحنا غاب من طريقنا القمر
وكل اللي كان بيني وبينك انتحر
عيونك مسافرة
بس يا حبيبتي فات الأوان
***
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com