كتب عصام عبد الحكم
تأتي أهمية السياحة الداخلية من كونها الرافد الآخر للنشاط السياحي بعد السياحة الخارجية، فهي تسهم بجزء لا بأس به من مدخول السياحة، وتنشط الحركة السياحية لا سيما في المواسم المنخفضة وفترات الركود، كما إنها تشكل مردود اقتصادي جيد في حال انخفاض نشاط السياحة الوافدة في ظل الأزمات كالأزمة الحالية.
أما على الصعيد الثقافي والاجتماعي، فالسياحة الداخلية تسهم بنشر الوعي حول المواقع السياحية وكيفية حمايتها، وحول التراث الثقافي والمعنوي وأهمية الحفاظ عليه، كما تسهم بنشر الوعي حول كيفية التعامل مع السياح الوافدين مما يؤدي إلى تقليص الهوة والفروقات الطبقية والاجتماعية بين السياح القادمين والسكان المحليين، ومن هنا تاتى قيمة السياحية الداخلية ويقول الاستاذ
أحمد السحرتى احد مديرى الفنادق ومن المهتمين بمشاكل العمال عن السياحة الداخلية
السائح المصرى ثروه لا نعرف قيمتها .
النزيل المصرى اللى مش عاجب حضرتك ده عباره عن ثروه للى يحس بقيمتها ويعرف يتعامل معاها صح .. النزيل المصرى الى من عاجب حضرتك ده سعره ضعف سعر النزيل الأجنبى .. النزيل المصرى اللى مش عاجب حضرتك ده بيبقى نازل مع نفسه يعنى تقدر تبيع له رحلات سفارى وبحر وخلافه مش زى النزيل الاجنبى اللى شركة السياحه بتبقى محتكراه من رحلات وبزارات وانتقالات … النزيل المصرى اللى حضرتك وبتنتهك خصوصيته وبتصوره وبتنشر صوره على الملأ وعمال تفضح فيه أحسن مليون مره للموظفيين من النزيل الأجنبى لانه بيحقق نسبة عمولة خدمه ( 12 % ) عاليه جدا وبالتالى بيرتفع دخل العاملين بالفنادق ..
النزيل المصرى اللى مش عاجب حضرتك ده مابيبقاش سكران ليل ونهار ومابيعملش مصائب زى النزيل الاجنبى .
قطاع الفنادق أكبر قطاع مستفيد من السياحه الداخليه وللاسف اكبر قطاع بيصور سقطاتهم وبيفضح فيهم دون اى مراعاه لخصوصية ضيفك .
احنا محتاجين اصحاب فنادق يبقى عندهم وعى بأهمية السياحه الداخليه اللى الظروف بتفرضها عليه .. احنا محتاجين إدارات يكون عندها وعى بثروة السياحه الداخليه كأمر واقع .. احنا محتاجين موظفين يكون عندها القدره على الارتقاء بمستوى رضى النزيل المصرى .
مين من اصحاب الفنادق فكر يعدل من الغرف او يعدل من البوفيهات او يعدل سياسته داخل الفندق بما يتناسب مع النزيل المصرى وليس الاجنبى ؟
مين من اصحاب الفنادق فكر يعمل كتيب صغير يوزعه على النزلاء ويوضح فيه بالصور بعض السلوكيات المصرح بها والغير مصرح بها داخل الفندق ؟
مين من اصحاب الفنادق فكر يعمل قسم خاص بعلاقات النزلاء المصريين ويكون دوره بديل لدور التورليدر اللى بيبقى مع النزيل الاجنبى طوال فترة اقامته وبيعمل على سرعة حل مشاكل النزلاء بما يتناسب مع امكانيات الفندق ؟
مين من اصحاب الفنادق عمل خطة تدريب للعامليين بأهمية السياحه الداخليه وقيمتها كثروه بديله ومستديمه ولا تتأثر بما تتأثر به السياحه الخارجيه وضرورة العمل على رضا النزيل فقط لان احنا بنبيع خدمه وليس سلعه ؟
بصراحه انا عن نفسى شايف ان قطاع الفنادق بكل اطرافه محتاج يتعلم يعنى إيه نزيل فندق قبل مايفكر ينتقده ويفضح فيه … …………….