مهجور ..
يا قلبي طريقك مهجور
ماشي بتدوّر ليه
والضلمة بلون النور
مهجور ..
يا فلبي طريقك مهجور
رحّال في مدايمك رحّال
يا قلبي وبتلّف وبتدور
وتلاقي نفسك في مكانك
وفي نفس الدايرة بتدور
مهجور ..
يا قلبي طريقك مهجور
ماشي بتدوّر ليه
والضلمة بلون النور
مهجور ..
يا فلبي طريقك مهجور
طول عمرك يا قلبي حزين
طول عمرك طير مكسور
منفي ..
مكفي ..
متهجّر ..
متكسّر ..
وهزيمتك حواليك داير ما يدور
وتدور ..
ياقلبي وتدور
وتعدّي السكّة لسكّة
وتعدّي السور تلاقي السور
ولا قادر تنسى ملامحها
ولا قادر تنسى هواها المغرور
مهجور ..
ياقلبي طريقك مهجور
مكسور في ماضيك وبتحلم
والحلم ياقلبي مبتور
ولا عارف تهرب م الحاضر
ولا ترجع للماضي المسحور
ولا قادر تسكت ..
ولا قادر تتمرّد ..
ولا قادر لحظة تثور
مهجور ..
يا قلبي طريقك مهجور
لا بكلمة حزينة اتودّعت
ولا حتى رسالة ولا سطور
ولا ذنبك إنك أخلصت
ولا يوم خنت
ولا كانلك في حياتها دور
غير إنك في هواها مسجون
وما بين أسوارها مأسور
مهجور ..
يا قلبي طريقك مهجور
كله سكات في سكات
كله دموع وآهات
ودواير حواليك بتدور
مهجور ..
يا قلبي طريقك مهجور
***