حنفترق ..
حنتسرق ..
من وسط وسط دربنا
ولا تسألي عني ..
ولا اسأل أنا عنك ..
ولا حدّ يسأل عننا
حنفترق ..
إنتي وانا
لأننا ..
عمرنا ما فهمنا بعضنا
ولا رسينا على شطّ واحد ..
في بحرنا
ولا اتقاسمنا مرّة ..
فرحنا
أو جرحنا
حنفترق ..
إنتي وانا
حلمنا ..
ما كانش يوم حلمنا
ولا عمرنا ..
رسمنا فوق شجر الجناين قلبنا
ولا عمرنا ..
كتبنا حيطان المداين إسمنا
يعني الزمان مش زمانّا
ولا المكان كان لنا
حنفترق ..
إنتي وانا
وما تسأليش
وما تدوّريش
ولا تقوليش إنتي السبب ..
ولا أنا
حنفترق ..
إنتي وانا
يا هلترا إنتي اللي خاينة
ولاّ اللي خاين كنت انا
ولاّ الخيانة في دمّنا
إنتي وانا ..
حنفترق ..
إنتي وانا
إيّاكي تبكي
وانا برضه مش حابكي
ولا حنسمح لدمعنا
إنه يبان في عينينا
أو حتى جوّه قلبنا
إيه فايدة الدموع
ما دام الرجوع ..
طريق وماشي ضدنا
حنفترق ..
إنتي وانا
راح اللي راح
وما عادش لينا غير جراح
وكأننا ..
إحنا كنا اتنين غير بعضنا
وكأنن ..
الدنيا للحزن بتشدذنا
وكأننا ..
الزمان ده مش لنا
وكأننا ..
إفترقنا بيدّنا ..
ولاّ يمكن مش بيدّنا
المهم ..
إن انتي وانا
حنفترق
إنتي وانا
ولا تسألي عني
ولا اسأل أنا عنّك
ولا حدّ يسأل عننا
***