غيري اللهجة
رتّبي حروفك من جديد
أنا ماستحقّش منك كده
أنا مشاعر مش حديد
ماتعدّيش على جرحي
ماتتمرجّحيش على جرحي
وماتسخريش من عشقي
وماتشطبيش إسمي وملامحي
هوّه انا عشان باحبك
ترميني في المنفى البعيد
غيّري اللهجة
كلّميني بشكل تاني
شكل الأحلام والأماني
بشكل حتى إنساني
حققيلي ولو ثواني
يا حبيبتي الحلم العنيد
…
غريبة الوشوش
غريبة الشوارع من بعيد
كنت اشتهيتك للوضوح
كنت ابتديتك ألف دوح
وانتهيتك بالجموح
والخيل حوافره من حديد
غيري اللهجة
وابدري الملامح من جديد
الليل غرايب
وانا لسه ماشي باستهجًى
شكل الميلاد
شكل البلاد يصبح حنين
آه من حنيني للرجوع
آه من آهاتي والدموع
قاتلاني دمعة في الضلوع
والجرح جوًايا عنيد
غيري اللهجة
وابدري الملامح من جديد
إبتديني أبتديكي
إشتريني أشتريكي
غيًريني أغيًر فيكي
واشتهيكي ولو لحظة وجع
لابد يوم تتغيًري
وتعودي تاني وتتصوًري
تترتني
تتقدري
لحظة مخاض الوليد
غيري اللهجة
وابدري الملامح من جديد
عيدي ترتيب الحروف
إدّيني حقي الوحيد
كلّميني باحترام
أكونلك الحلم الأكيد
مش عشان باحبك
تمليني جراح وصديد
غيّري اللهجة
ويالاّ نبدأ من جديد
***************