البحر والبرد .. بقلم / عادل عبد الرازق

البرد ريحة البحر
وانا قلبي يود ..
لكنه متمدد جراح
…
خارج لدروب المدى الوسيع
مبلول الملامح معفر التقاطيع
يمكن باتوه
جايز باضيع
وعلى جلد كفي
الليل بيخنق الصباح
…
معانداني الخطوة وتاعباني
وانا لوحدي وأحزاني
أقعد على حجر
واكتب رسايل
والجرح في قلبي
يا حبيبتي سوّاح
….
صاحبت كل أرصفة الدروب
وصاحبت الليل والغروب
ووقفت قدام كل الأبواب
وانا مامعاييش أي مفتاح
…
عدّى مغني عجوز
قال يا ولدي ليه تنتظر
يا ولدي إنت بتنكسر
بين الريح والمطر
وكأنك في فك تمساح
…
يا حبيبتي دوّري عليّا فيكي
بين شفايفك وفي عينيكي
ده قلبي نص ليا
ونص ليكي
ويا بخت من بدأ السماح
…
إرجعيلي
ورجعيلي
عمري اللي راح هدر
تحت المطر
وكفاية العمر اللي راح
…
إسبحيلي
حتى لو ضد اليار
تعاليلي
أنا يا حبيبتي بانهار
ما بين البحر والبرد
تايه أنا في البراح
***