الناس بتجرى ورا الفلوس
الناس بتجرى ورا الفلوس
والطمع ملا كل النفوس
والغنى بيدوس ع الفقير
وكل همه ف زيادة ماله
واحد يبص للى ف ايد غيره
ناسى ربنا وبينكر خيره
مهما المولى يوهبه ويديه
مايبطلشى ابدا يشتكى حاله
والقوى بياكل ف الضعيف
مستخصر فيه حتى الرغيف
والقلوب صارت حجارة
هو البشر ايه جراله
اللى يعاير غيره على الفقر
ويخطف لقمته زى الصقر
ولا يهمه ان كان جعان
او عايز يشترى دوا لعياله
واللى ما يعرف غير المعاكسة
ويتمنظر بعضلاته جته وكسة
ويقف قدام المرايا بالساعات
طاير م الفرحة بجمالة
و اللى بيفترى على الناس
ولا عنده دم ولا احساس
علشان عنده شوية صحة
ايه ها يعمل لو المرض طاله
وواحد نسى انه هايموت
واخد الدنيا بعلو الصوت
وبيستحل مال اليتامى
وفاكر ان الدنيا دايماله
وواحد بيدوس على الغلابة
بينهش فيهم زى الديابة
ونسى ان الموت قريب
فى لحظة ممكن يدق بابه
والكل نسيوا ان ربنا شايف
فاحص قلوب الناس وعارف
وحتما يوم نقف قدامه
وفين راح نهرب من سؤاله
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com