كتبت ناريمان حسن
فى لحظات الزمن بيقف عندها وممكن تحدد مصير حياة كاملة وانهاردة البطل الملازم احمد عبد اللطيف كان بيحكى لاطفال 57357 عن اللحظة اللى قرر فيها انه يتحدى الخوف ومايوقفش حياته عندها
“اللحظة اللى عرفت فيها ان رجلى اتبترت نتيجة اصابتى فى احداث سيناء اعتقدت ان الحياة وقفت وان مفيش امل بس افتكرت ان كان ممكن استشهد و الحياة اديتنى فرصة جديدة انى اعيش واكمل واحقق احلامى وانا قررت استغل الفرصة دى وكنت بتمرن وانا فى المستشفى علشان اشارك فى بطولة العالم لمتحدى الاعاقة فى السويد واتكرمت من الرئيس للمرة التانية وكل طفل فى 57357 لازم يكمل مشواره ويدافع عن احلامه ومايسمحش لليأس انه يوقفه”
وكان مع الملازم احمد عبد اللطيف فى زيارته للمستشفى البطل اسامة من ابطال 57357 اللى بنعرف منهم قيمة الحياة ، اسامه بترت رجله ولسه بيكمل علاجه و عنده امل كبير فى بكرة.
اسامه من ابطال 57357 والملازم احمد عبد اللطيف من ابطال الصاعقة بيقولوا رسالة لكل واحد فينا ان كل تجربة قاسية بنمر بيها لازم نخرج منها اقوى ولازم نثق فى احلامنا نقدر قيمة الحياة.
