سلام مخلوط بمية وردْ
علي الإيد اللي شقيانةْ
علي الناس اللي بردانةْ
علي قلوبها اللي دفيانةْ
برغم أنه ده عز البردْ
مادام حبل الوداد موصولْ
وكله ماشي بالمعقولْ
مادام راضي وابن أصولْ
برغم أنه الحياة ع الأدْ
سلام للعامل الصاحي في عز الفجر
ماهو ظابط أوان ساعته
علي صوت الآلات والحفر
علي الخير اللي منها امتدْ
سلام ع المصنع الشغّال
علي الإيد اللي بتعمر
علي البنّا .. .علي الغَزّال
علي اللي من أزرهم بيشِدْ
سلام الحب للمدن اللي مبنيةْ
بإيد أعظم صنايعيةْ
علي اللي بيبني ويعمر
علي اللي بيخلص النيةْ
ومايحطش لحلمنا سدْ
سلام للعلم والتعليم
علي العَالِم علي الدارْسِينْ
علي اللي بعلمه بينور
ويمحي جهل جاهلينْ
ويوضِع للظلام الحدْ
سلام ياغالية يابهيةْ
ياصامدة رغم حُسادكْ
قوية رغم أعدائكْ
تلمّي وتحضني ولادكْ
ويحموكي لأنه فرضْ
سلام علي كل من يِحْمِي
وقبل شهادته بيسمّي
علي اكتافه الحمول تِرمي
وهو صان تراب الأرض