وفي وسط الطريق
سألت نفسي سؤالين
عايش ليه انا …
ومين انا ورايح فين
أنا الدموع جوّه الضلوع
أنا القلب اللي موجوع
أنا لا وصول ولا رجوع
في بحر من غير شطّين
وفي وسط الطريق
سألت نفسي سؤالين
أنا ليه جيت الدنيا
وانكتبلي فيها المشوار
أمشي الدروب المسدودة
واوصل .. بس لأسوار
غريق يا قلبي غريق
ولا جوّنا غير الحريق
ودمعة من غير بريق
جوّه القلب مش عالخدّين
في وسط الطريق
سألت نفسي سؤالين
يا خساره ياريتني ماجيت
ياريتني ما كانلي بداية
ولا مشيت خطوة واحدة
ولا كانلي سطر ف الحكاية
لا حد قادر يجاوبني
والأسئلة بتدوّبني
وتشرّقني وتغرّبني
في قلب قلب السؤالين
*****