في لحظة واحدة
وبكلمة شاردة
إفترقت إيدينا
وابتدينا نبعد
إبتدينا
وابتدينا نتوه
وتتوه الدنيا حوالينا
وابتدت تبان
دمعة ف عينينا
يا هلترا كنتي قاصدة
ولاّ انا اللي كنت قاصد
ولاّ الزمان ضحك علينا
دلوقت أدينا بنفترق
ورسايلنا القديمة بتتحرق
والسنين والماضي بيتسرق
والبحر عاشق للغرق
والسفينة ..
تايهة السفينة
في الدوّامات والذكريات
في اللي راح واللي فات
إيه اللي غيّرنا كده
إيه اللي كسرنا كده
يا حبيبتي إيه اللي بينا
إحنا اللي كنا الغناوي
واحنا اللي كنا الخطاوي
واحنا اللي كنا الحكاوي
إتغيرت ليه ملامحنا ومعانينا
وازاي دلوقتي ماشيين بتبكي
وازاي دلوقتي نايمين بنبكي
وكل ما بنبكي بنبكي
والدمعا دايماً ساكنة عينينا
شىء غريب مالي الشوارع
اللي تايه واللي ضايع
واللي رايح واللي راجع
والخطوة تعبانة وحزينة
كل الوشوش متغيّرة
كل الملامح متحيّرة
والمشاعر متكسرة
ومقفولة أبواب المدينة
وانتي وانا
ماشيين بنبكي
عاللي فات
ماشييت بننده الذكريات
ولا حد بيرد علينا
في لحظة واحدة
وبكلمة شاردة
يا حبيبتي افترقت إيدينا
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com