وشّك رحيل
تحت الليالي مجروح الملامح
وانا فارس كسير
منفي ومكفي على الطرقات
تايه في اللي جيّ
متغرّب في كل اللي فات
ولا دقيت أبواب
ولا شوفت الأحلام
ولا فكّيت الشمس المخنوقة
على جبل الأيام
…
عشقك حصار
وصدرك ده أضيّق من شقوق الكون
حضنك دمار
وانا خايف ينسى وشّي اللون
قمرك ده غيّم في لحظة ليه
وفانوسك انكسر
وسبتيني بين الظلام
…
يا حبيبتي
عشقت وعشقتي
يا حبيبتي
تعبت وتعبتي
وانتهينا ليه
ليه بالخصام
…
غيّم قمر
بدأ السفر
تحت المطر
واللي باع باع
واللي خان خان
على أول الشارع الحزين بنفترق
وكل رسايل غرامنا بتتحرق
وحتى ذكرياتنا بتتسرق
وفوق الورق …
كان الوداع أخر كلام
…
طريقنا دموع
مفارقنا أحزان
طريقنا مش هوّه طريقنا زمان
متلوّن الحكاية دموع
والقوارب حاضنها الغرق
القلب كان ليه انكسر
والحب كان لبه اتخنق
والحلم البرىء على كفوفنا
يا حبيبتي إتشنق
وعالمفترق …
كان الفراق هوّه الختام
…
وبترحلي
وارحل أنا
وبنفترق
عن بعضنا
ولا كأننا
عرفنا يوم بعضنا
واللي محيّرني يا حبيبتي
ماعرفش انتي السبب
ولاّانا
ولاّ مين اللي موّت حبنا
وخلاّنا نفترق بالدموع
بدون كلام
أو حتى سلام
***
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com