مشربيات .. وغنوة .. ودمعاية .. بقلم :- عادل عبد الرازق

مشربيات ..

وغنوة ..

ودمعاية ..

لونك شريد اللهون

والحرف مخنوق في الكلام

شافت عيوني الدروب

المشربية الأولى ضلام

طارت عصافير الأشجار

طارت كل الأطيار

من شطّ البحر لحدّ القمراية

مشربيات ..

وغنوة ..

ودمعاية ..

المشربية التانية أول شارعنا

متشبّكة ف أخر مدانا

كل الحكاوي حزينة

يا حبيبتي وانا وانتي حزانا

المشربية التالتة غروب

تايهة بين الدروب

مرهونة لدمك ..

ولبكايا

مشربيات ..

وغنوة ..

ودمعاية ..

تتصوّري …

تتصوري إني عشقتك رغم خوفي

تتصوري ..

إني لضمتك بين حروفي

لكنك بعدتي ..

واختفيتي يا حبيبتي

غنيّتي أه ..

لكن دموع

ومشيتي أه ..

لكن رجوع

ولمّا وصلنا المشربية الأخيرة ..

إختفيتي فجأة ..

وما لقيتش أثرك في الحكاية

مشربيات ..

وغنوة ..

ودمعاية ..

***

******************