إتوجعت قد ايه
وطلبت منهم يسندونك
سدوا الودان قفلوا البيبان
كان بس همك يسمعوك
و فضلت تسند ع السنين
والحزن وحده يشد فيك
الذنب مش ضعف القلوب
ده القلب كان همه الهروب
والعقل رافض ينكسر
انسان وحيد وسط الشتات
ازاي هايقدر ينتصر
كان نفسي ابقا ف المكان
يمكن إيديا تنقذك
قبل الضياع
ويجوز اقولك كلمتين
تضحك اوي
تنسي الوداع
جوانا زيك…
الف دمعة والف حزن
جوانا شئ بيقول.. ياريت..
..لوبس حضن.
لو بس لحظة فضفضة
صعب القضا لكنه نافذ ع التخين
لوكنت مين مكتوب عليك
كان نفسي بس أحكي ليك
حكايات كتير يمكن تطيب دمعتك
وادي ضحكتك فارقت في غفلة مننا
ازاى نأمن للسنين وازاي نصدق حلمنا