العصافير و الغربان بقلم : عادل عبد الرازق

أنا كنت حالف مااعشقك
بس القدر رماني في سكّتك
خادتني عيونك ولاّ شفايفك
ولاّ خادتني ضحكتك
ماعرفش ليه ملت ليكي
ماعرفش ليه قلبي نداكي
وماعرفش ليه كنت ضحيّتك
…
ملامحك اتغيّرت بين الليالي
كل الجليد غطّى ملامحك
شطّ اسكندرية رماني
وانا كنت عاشق مطارحك
رفرفت على صدرك وغنيّت
لقيتني في لحظة انتهيت
على أول خطوة في سكّتك
…
كنت فاكر
إن شفايفك لسه بتتعلّم
أتاريني لسه باتعلم
ولا عارف اشرح احساسي
ولا أتكلّم
حبك رماني وكسرني
هزمني ولا عمره نصرني
وشطب حروفي من غنوتك
…
الشارع يا حبيبتي مجمّعنا
بس انتي ف ركن وانا في ركن
إنتي واقفة بتضحكي
وانا واقف شايل كل الحزن
غرقت كل الشطوط
والنورس رفض الهبوط
على شطوطي و رملتي
…
تعبتني الطرقات والخطوات
تعبتني الأسوار والجدران
مررّت الأشعار اللي بتحلم
في قصايد الحب بالأوزان
م الشارع طارت عصافيرنا
ولقيتني بين الغربان
***