متابعة :- محمد زكى
في آخر شارع السيرب بمدينة بنى عبيد التابعة لمحافظة الدقهلية تعيش أم الخير منصور السيد المتولى 63 سنه ضعيفة السمع وتعمل بالأجرة فى الأراضى الزراعية وأبنائها داخل بدروم تحت الأرض بالإيجار لا يزيد مساحته عن أمتار قليلة
https://youtu.be/lbOHUXoiczE
وقالت الأم الملكومة أم الخير منصور السيد المتولى 63 عام زوجى طلقنى ورحل منذ 10 سنوات وترك لى 5 بنات وولدين ومنذ هذا التاريخ لم يسأل على أبنائه لأنه من خارج بنى عبيد وعلى الرغم من ذلك لم أتخلى عن أبنائى بسبب الفقر و فضلت أشتغل عند الناس لغاية ما جوزتهم بس هما غلابة الخمس بنات غلابة كلهم وظروفهم المعيشية صعبة جدا منهم متزوج هنا فى البلد ومنهم متزوج خارج بنى عبيد عندى نجوى 39 سنه وإيمان 33 سنه وأمانى 31 سنه وهدى 30 سنه وعبير 24 سنه وولدين إبراهيم 27 سنه وعلى 21سنه وعقله على أده
وأكملت الأم أعيش فى هذا البدروم مع أبنائى إبراهيم وعلى وهدى مطلقة وبتشتغل عند الدكتاترة عشان تساعدنى لأننا بندفع 300 جنيه إيجار وملناش مصدر للدخل إلا بناخد معاش مطلقة 320 جنيه بندفع منهم 300 جنيه إيجار وبسرح وبنتى كانت بتشتغل والوقتى بتدور على شغل وأنا بصحى كل يوم من الفجر أعمل بالأجرة فى الأراضى وباخد معايا إبنى على 21 سنه يجيب أجرة هو معرفتش أعلمه وعشان كدا هو بيعامل معاملة الأطفال وعلى الرغم من ذلك فؤجئت إنهم هيخدوه فى الجيش وأنا ماليش حد ومش عارفة هيعمل إيه دا ميعرفش يعمل أى حاجة
من جانبها قالت هدى إبراهيم محمد إبراهيم 30 سنه إبنة الحاجة أم الخير أنا مطلقة ومريضة عملت 6 عمليات وقاعدة مع أمى وبحاول أساعدها على قد ما أقدر لأنها كبرت فى السن وأصبحت غير قادرة على العمل وإشتغلت حاجات كتير ( مسيح وغسيل وكنيس ) 12 ساعة عند ناس كتيرة بس المبلغ قليل أوى وتعبت ولما طالبت يزودوا مردوش
من جانبه قال الشاب على إبراهيم محمد إبراهيم 21 سنه إبن الحاجة أم الخير إحنا غلابة وأنا متعلمتش وبروح مع أمى الأراضى الزراعية أساعدها ومش بطلع فى الشارع العيال مش بيلعبوا معايا وبيلقوا فيا طوب ولما واحد من العيال دول جه يضربنى وبحاول أحمى نفسى أهله جم دخلوا علينا وضربونا عشان مستهترين بينا ومش لينا حد وأكمل الشاب فوجئت بأنى رايح الجيش وأنا معرفش حاجة وخايف على أمى مش عارف هتعمل إيه وهتعيش إزاى
وفى ذات السياق طالب محمد عبد الغنى شادى أحد شباب المدينة الدكتور أحمد أحمد شعراوى بسرعة التدخل ومساعدة هذه الأم المسكينة وأبنائها لكى يعيشون حياة كريمة مؤكدا ً أنهم فى أشد وأمس الحاجة
