أنزل أنتخب مين ؟ وانا شايف الشريف والحرامى والمتحايل والنصاب والسفيه و الغاوى !
أدى صوتى لمين ؟ وانا فرزت الكل من ييجى سنتين اشرفهم تمويله مجهول المصدر !
وناس موقعة لأحزاب فى السر .. وناس تانية بتصرف على أحزاب وناس أحزاب بتمولها !
ملايين اتعمل بيها لافتات .. وزيها واكتر رشاوى .. وشوية أعمال للخير !
ما فيش حد صاحب فضل على البلد .. كلهم بيصرفوا من خيرها ..
اللواءات .. من خير الخدمات وتعيين الخفراء وهلم جرا ..
ورجال الأعمال والأحزاب بيصرفوا من قوت الشعب .. والمناقصات المشبوهة ..
أنزل انتخب مين وكلهم عاملين تحالفات .. والله ما لصالح الإبراهيمية ولا يحزنون !
التحالفات لصالح تركيبة الحكومة المقبلة واللى مسئول عنها سويراس و أبو هشيمة و السيد البدوى واحتمال بالمال ينضم كمان حزبين !
أنا هانزل اقول كلكم فاشلين ولا أثق فى أى منكم ..
لأن لو واحد بس فيكم صادق كان بثمن اليفط اللى اترمت فى الفاضى كان شطب دور واحد فى مستشفى الأورام بالزقازيق .. أو تجهيز عناية حقيقية بمستشفى بمركز أو الجامعة !
للأسف .. كلكم بكاشين كلكم بتوع خيلة ولا واحد صادق مع الناس ولا مع نفسه !
وبمجرد الإنتخابات ما تخلص هانشوف ايه الجديد .. الإنتخابات لعبة قذرة اقذر من السياسة ..
والخطط اللى الدولة بتوضعها لا دخل لنائب فيها ولكنه يعرفها من الكنترول فيروج لها بإسمه !
من من هؤلاء سيحاسب الفسدة من الموظفين سواء بالمجلس أو الوحدات أو الإدارات وهم كانوا يعاونونهم فى المسيرات والمؤتمرات وبالتالى لهم فضل وحق ومش بعيد يحموهم ويرقوهم بدلا من محاسبتهم !
لسه بدرى يا إبراهيمية لما يبجيلك الولد .. وسيبك من الرية الكدابة اللى شغالة !
التعليقات