إتنين .. بقلم : عادل عبد الرازق

إبتدينا اتنين
وانتهينا اتنين
إتقابلنا اتنين
وافترقنا اتنين
عمرنا ما كنا واحد
ولا قدرنا نتاحد
ونقف قدام
الأيام والسنين
يمكن كنا
لسه صغيرين
ولاّ مش فاهمين
أو احتمال كنا
يا حبيبتي بوشيّن
كأننا كنا سطرين
على الرمال مكتوبين
كأننا كنا بنسبح
في بحر من غير
شطّين
كنا فاكرين الحب
سهرة حلوة
وشوية فل وياسمين
أشعار نهمسها لبعضنا
وكلمتين وغنوتين
لا صدقنا الحسد
ولا اعترفنا بالحاسدين
ولا عمرنا همّنا
أبداً كلام اللايمين
ولا خفنا
من كلام العرّافين
كنا صافيين
كنا مصدقين
ماشيين
وهايمين
حلمين ومرسومين
في دنيا من الخيال
وعالم من الحنين
وفجأة
كانت المفاجأة
يا حبيبتي بكلمتين
ودمعتين
وخطوات متبعترة
ومرمية على الناحيتين
إحساس حزين
بجد يا حبيبتي حزين
بنبعد
ومش قادرين
ونمد الإيدين
إيدينا قصيرن
مين غيّرنا مين
مين بدّلنا مين
مين فرّقنا مين
إنتي ولاّ انا
ولاّ الزمان
ولاّ السنين
ولاّ كنا بنحلم
يا حبيبتي حلمين
إبتدينا اتنين
وانتهينا اتنين
إتقابلنا اتنين
وافترقنا اتنين
***
عادل عبد الرازق ،،،