صحيح إن التصعيدات مستمرة بشأن أزمة #قطر لكن بوجهة نظر أبعد وأكثر عمقًا، الأزمة أعطت الفرصة للتقارب التركى الايرانى واستغلال ما يحدث لصالحهم، واللى بيدعم التقارب ده هو استثمار الهجمات الارهابية اللى بتحدث لاول مرة ضد #إيران، واللى حدثت فى توقيتها اثناء #القمة #الامريكية #الاسلامية اللى منعقدة بالاساس ضد ايران،
فاستثمار الهجمات الارهابية من ايران سيعطيها الضوء الاخضر للدفاع عن نفسها بحجة مكافحة #الارهاب وربما ده يعزز من فرص تدخلها فى أزمة الخليج بالتنسيق مع #تركيا اللى بتعانى هى الاخرى من الارهاب، خاصة اذا كانت ايران فتحت مجالها الجوى لقطر حتى تكون حلقة وصل بين التبادل القطرى التركي عبر أراضيها وضرب الحصار العربى فى مقتل، وده اللى جعل وزير خارجية ايران يروح النهارده تركيا
أما بالنسبة للسماح بنشر قوات #مسلحة تركية في دولة قطر، على الجميع أن يعلم أن دولة قطر لها نفس الشيء على الأراضي التركية، ولكن هل من جيش قطرى بالأساس ينتشر فى تركيا !!
طيب ايه الهدف من الاتفاق ده؟ ، الهدف من الاتفاق ده هو بدء التنفيذ للاتفاق المبرم بالأساس بين تركيا والولايات المتحدة #الأمريكية حول تدريب وتجهيز المعارضة السورية من خلال نشاطات القيادة العسكرية المركزية الأمريكية اللى موجودة بالاساس فى قطر
ده غير ان الاتفاق ده هيمكن قطر لاول مرة من اجراء #مناورات عسكرية مشتركة مع تركيا فى المنطقة واهو كله بيوصل رسائل ردع لمن يعاديه
طيب هل ما يحدث ضد قطر يحدث بسبب قربها من ايران وانها دولة بتتدخل فى شئون الدول الاخرى وبترعى الارهاب ؟ الاجابة : لأ، علاقة قطر بايران معروفة للجميع وقطر من 2011 معروفة بدعمها لـ #الاخوان هى وتركيا، يبقى اشمعنى دلوقتى ؟
ده غير إن فيه دول اخرى زى #الامارات، قيمة التبادل التجاري بينها وبين إيران وصلت إلى 6 مليار دولار عام 2016 !! ودولة زى #عمان تعتبر حليف استراتيجي لإيران وتجمعهما علاقات مميزة !! يبقى ليه قطر دلوقتى ؟
الاجابة على السؤال ده باختصار راجعة لرغبة #ترامب فى تغيير ما كان يتم الاعتماد عليه من إدارة #اوباما وهى حركات الاسلام السياسى، ده غير ان مراكز الفكر الامريكى والمسئولين السابقين والناس دى ارائها بيتاخد بها جدًا مش بيتم تجاهلهم، الناس دى من يناير اللى فات طرحت فكرة الاستغناء عن قطر لانها اصغر من كونها حليف استراتيجى وأمنى للولايات المتحدة فى #الشرق الاوسط
الكلام ده جاء على أهواء الدول المتحالفة حاليا ضد قطر، عشان كده ترامب لما زار الرياض، كان عربون الصفقة دى للأمريكان هو الــ 380 مليار دولار قيمة صفقات #السلاح الأضخم فى العالم بين السعودية والأمريكان
وكل التصعيد اللى بيحصل دلوقتى ، عشان الولايات المتحدة تبلع الطعم ويظهر لها انه بعزل قطر لا قيمة للدعم الامريكى لها وتتنقل القاعدة العسكرية الأمريكية من قطر لدولة أخرى ويتفرغوا هما لمحاسبة قطر او ابتلاعها وده الهاجس اللى قطر بتسعى للرد عليه الان من خلال تعاونها مع تركيا وايران
لكن كل ده مرهون فقط بمدى قدرة نظام تميم على استعادة ثقة ادارة اوباما فى ادارة ترامب وعلى دحض المحاولات القطرية من الدول المتحالفة ضد قطر.
و فى النهاية ، ما يحدث الأن بيكرس لصراع فى المنطقة ربما يكون أكبر من العرب أنفسهم، والكاسب في النهاية هما الأمريكان وحلفاؤهم خاصة اذا استطاعت قطر أن تجد مخارج لها.
تحياتى وتقديرى للجميع.
#حسن_السعدني