صعبان عليا أمي
شالت كتير همى
وشافتنى ف الأخر
غرقان هنا ف دمى
كان حلمها تفرح
وتشوفنى ف الكوشة
كان نفسها تزغرد
وتبوسنى 100 بوسة
كانت مواعدانى
يوم الفرح ترقص
كلمتها ف ودانى
سامعها اهى بتهمس
بتقولى يا ضنايا اوعاك تشيل الهم
هجيبلك السلسلة والدبلة والمحبس
كانت مواعدانى… يوم الفرح ترقص
وانا كنت واعدها
اجيبلها ف عيدها
مصحف مع الطرحة
قالتلى شوف يا ابنى
دى قعدتك جنبى
بتساوى 100 فرحة
امى وماليش غيرها
وعيونى عشقاها
ازاى هودعها
والحزن جواها
سامحينى يا امايا
اسف ومش قصدى
مكانش برضايا
تتحرمى من حضنى
آسف أنا ماشى
والذنب مش ذنبى
فيه ناس مرحماشى
استرخصوا دمى
يا اما بلاش البكا
دمعك بيوجعنى
هو فى اخر لقا
دمعك يودعنى؟
ما تزغردى يا اما ووزعى الشربات
ترضى أن يوم دخلتى يكون سكات فى سكات
اليوم ده يوم فرحى
قومى ارقصى يا اما
وملايكة بتزفنى
واخدنى ع الجنة
لو شوفتى يا اما سعاد
قوليلها تنسانى
وقوليلها كان حبها
ساكن ف شريانى
كان فيه ما بينا ميعاد
بس الأجل جانى
قوليلها مات الواد
شوفى حبيب تانى
شوفى حبيب تانى