مالح ..
ممرّر ..
في حلقنا-
والدمعة في عينينا
وعلى خدّنا
مرساها فوق كفنا
طعم السكات
مالح ممرر في حلقنا
دموع ..
ولاّ خضوع
ولاّ يا قلبي بنفترق
ولاّ قلوبنا بتتسرث
ولاّ البحور …
صبحت ماتعرفش غير الغرق
بندوب ..
في الأحزان وبدون أسباب
بندوب
وكل ما نحلم شمس ياخدنا غروب
ولا لينا خطايا ولا لينا ذنوب
ولا يوم اتمرّدنا على الدنيا
ولا مرّة كفرنا بالمكتوب
ولا عمرنا حلمنا ..
غير بس فوق الورق
طعم السكات سكات
والجرح في قلوبنا قدر
متغرّبين في الشوارع
متفرّقين تحت المطر
والبحر ساجن مراكبه
واحنا لسه بننتظر
حزينة يا نغمة ف قلوبنا
وحزينة فوق الوتر
من أدّ إيه واحنا بنبتدي
من أد إيه واحنا بننتهي
وفي كل خطوة بننكسر
الشارع ده مش شارعنا
ولا النجوم دي نجومنا
ولا البحر ده بحرنا
طعم السكات
مالح ممرر في حلقنا
عاشق حنايا قلبنا
ونفسنا
وجلدنا
وكأننا
في الدنيا دي يا قلبي لوحدنا
ولا أنا ..
مانيش أنا
إنكسار ورا انكسار ورا انكسار
وكل ما بنوصل نعود
نرسم شوارع
نحلم شوارع
والنهاية دايماً سدود
مقفولة شبابيك المدينة
مقفولة أبواب الوجود
وكل ما بنحلم ببكره
دموع الماضي تشدّنا
ولا قادرين نتكلم
ولا مسموح نتألم
ولا مسموح لنا
يا قلبي غير صمتنا
طعم السكات ..
مالح ..
ممرّر ..
في حلقنا
**