عاشقين السكات .. بقلم:- عادل عبد الرازق

صوتك وداع ..

وانتي وانا من غير ملامح

تفاصيل وشوشنا مغيّمة

والضلمة حاضنة كل المطارح

واسكات هوّه السكات

والميلاد زيّ الممات

وانتي وانا ماشيين ..

بس ف طريق الذكريات

لؤانا حزين ..

كلامنا حزين ..

وفي حزننا تايهة الدموع

بدأ السفر ..

بدأ الرحيل ..

والوصول لون الرجوع

إنتي وانا كنا وكان ..

ولا عادش باقيلنا غير فتات

يمكن بنحلم ..

جايز ده وهم ..

ولا انتي وانا مش إحنا

الملامح ملامحنا ..

المطارح مطارحنا ..

بس ليه الشوك جارحنا

زي ما نكون بنفترق

أو متغيّرة ف عينينا الحاجات

عيونا دموع ..

خطانا رجوع ..

وريحة الدمع طالّة من العيون

يا هلترا احنا صحيح بنفترق ..

ولاّ واخدانا حالة جنون

زي ما يكون في وداع أخير

زي ما نكون عاشقين السكات