يا باسم دى بلد العجايب
العدل فيها دايما غايب
وصال الحق مات و انقطع
و حبل القانون دايما سايب
ميزان الحق كفوفه مايلة
عمايله تملى غريبة و هايلة
امتى بقى ينظبط الميزان
ولا هو ماشى بالمحايلة
يا ميزان العدل ساوى كفوفك
كلمة الحق متعرفش كسوفك
بكرة هتقابل رب اسمه الكريم
هتقوله ايه لما بكرة يشوفك
لا حد حالل ولا حد رابط
حتى الدستور شكله هابط
فين حقوق المساكين
الضرب على راسهم خابط
يا أهل الميزان خلوه محايد
لا يبقى ناقص ولا حتى زايد
رجعوا الحق لأصحابه
خلوا الحق دايما سايد
هو فين اللى اسمه قانون
من برئ مرمى فى السجون
صعبان عليا منك كتير
يا بلدى يابلد يا ام الكون
هو المسكين قتل قتيل
ولا عمل ياناس المستحيل
ولا حول ضى النهار
لعتمة و كحلة و ليل
المسكين متهم بإزدراء أديان
مع انهم ماسبوش الفرض عين
حرام عليكم ظلم المساكين
ولا هو أصبح جنان فى جنان
والميزان. ليه مش مظبوط
ولا هو بقي افترى و جباروت
ولا احنا خلاص فى غابة
مليانة اضطهاد و طاغوت
خلاص بقولها قدام الجميع
حق المساكين مش هيضيع
واعلموا فى رب لوحده قادر
يحول الكون من الشتا للربيع
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com