ذكريات ..
ودموع ..
وإنتي ..
ولون الغيوم … والمسافة
وإيدين بتفارق إيدين
ودمعة دبلانة ومتشافة
الضياع واخد إيدينا
والدموع اللي ف عينينا
السكارى والحزينة
واخدانا على أد المسافة
ذكريات
ودموع
وإنتي
ولون الغيوم … والمسافة
ألف أه يا طريق وأه
على ذكريات العمر اللي راحت
حبيت أكون ما قدرت اكون
غير دمعة مرًة على نني ساحت
مش صعب ياخدنا مطر
مش صعب يرمينا قدر
لكين اللي صعب ننكسر
واحنا مش أد المسافة
ذكريات ..
ودموع ..
وإنتي ..
ولون الغيوم … والمسافة
إحنا انكسرنا قبل البداية
إحنا انجرحنا قبل الوداع
ضاعت ما بيني وبينك حكاية
واللي جمًع ما بينا الضياع
كدب كان ولا غرور
ضلمة كانت ولا سور
ولا كان تصريح مرور
خارج عن نطاق المسافة
ذكريات ..
ودموع ..
وإنتي ..
ولون الغيوم … والمسافة
ذكريات هيًا اللي بقيت
واللي راح كان المصير
أنا كنت فاكر إني فارس
واتاريني ف إيديكي كسير
إنتهيت بإيديكي إنتي
وانتهت ويايا حكايتي
وابتديت اعرف نهايتي
إني وحدي في المسافة
ذكريات ..
ودموع ..
وإنتي ..
ولون الغيوم … والمسافة
وإيدين فارقت إيدين
واللي بينهم كان مسافة
***
By جريدة الفراعنة
(جريدة الفراعنة) عندما يكون للحرف معني ، جريده مصريه مستقلة شامله تعبر عن مختلف الآراء لمختلف الأطياف نرحب فيها بآرائكم ومقالاتكم وأشعاركم وأخباركم ، نقدم خدمه إخباريه ثرية لدينا عدد كبير من المراسلين المميزين و نخبه من الكتاب البارزين ويسعدنا أن تكون جريدة الفراعنة مدرسه لتخريج جيل من شباب الصحفيين جريدة الفراعنة مستقبل له جذور أسسها محمد زكي في ديسمبر 2011 البريد الإلكتروني alfaraena1@gmail.com