يا ابنى مالك إيه جرالك
يا ابنى مش عاجبنى حالك
إحكى قول لى إيه اللى بيك
فضفض قول ع اللى ماليك
يا آمااا ما فيش ما تقلقيش
أنا مبسوط ما متتخضيش
طب يا نن عينى إحكى
هاسمعك من غير ما أقاطعك
بس قول
يوووه يا أمى قلتلك أبدا
ما فيش
إنتى إيه ما بتسمعيييييش؟
سكتت أمى عن الكلام ودمعت
بس دارت دمعها وكتمت زعلها
ف قلبها
بدأت تخيط ف القميص
ومعاه تخيط جرحها
لقيتنى فجأة جريت عليها
واترميت ف حضنها
سامحينى يا آمااا ما تزعليش
وآدى راسك أهيه يا غالية
بس عليا ما تغضبيش
يا آما الدنيا عليا قاسية
مش عارف أفرح وأعيش
الصحاب وبعدوا عنى
وقت ضيقتى وشدتى
واللى كنت فاكره صاحبى
باعنى يا آماااا بالرخيص
قدامى يضحك ف وشى
ويقول لى صاحبى وأخويا
بس يا دووب أسيبه وأمشى
ومعاهم يجيب ف سيرتى
قال وفاكروه يرد غيبتى
واللى قلبى ودها وحبها
وزرع أحلامه ف قربها
واللى كات رسمت معايا
حلمها
وحلمت تبقى أم لابنى
وابنها
قالت لى إبعد من سكات
كل اللى بينا ماضى فات
خطوبتى بكرة واعتبرنى
ذكريات
شفتى يا آماااا فيا إيه
وكنت مخبى عنك إيه
ما كنتش عايز أحكى ليكى
لاجل ما تبكيش عنيكى
عينى يا ابنى ع اللى بيك
كل ده شايله لوحدك
كل ده شايله وساكت
حط راسك بين ضلوعى
إترمى ف حضنى ونام
إدفن الوجع اللى بيك
جوه قلبى
حضنى يا ابنى هيحتويك
مش هيسيبك غيرلما بس
يداويك
إغسل يا ابنى كل وجعك
جوه بحر دموع عنيا
واتوضى ف كف إيدى
قوم وصلى ف حضن قلبى
إدعى ربك وإنت ساجد
بين ضلوعى
هتلاقينى بادعى زيك ول دعاك
بأقول آميييين
ربنا هيفك كربك يجلى حزنك
يا ابن عمرى وابن قلبى قول آمين
قوووول آميييييين