———————
مش لينا الزمان
————-
مشربيات الشوارع
والحيطان من غير بيبان
واللي رايح واللي راجع
مابيسمعوش صوت الأدان
رافضة وجودنا مدينتنا
حتى أسامينا باعتنا
ومشينا واحنا بدمعتنا
في شوارع النسيان
مشربيات الشوارع
والحيطان من غير بيبان
العيون من قزاز
والوشوش من رخام
الخطاوي مرعوشة
والقلوب لون الآلام
متحيّرين في الوجود
كل ما بنوصل نعود
والشوارع سدود
مدبوحين قبل الآوان
مشربيات الشوارع
والحيطان من غير بيبان
من كام سنة يا قلبي
والوصول زيّ الرجوع
من كام سنة يا قلبي
والعيون بحر دموع
البداية هيّا البداية
والنهاية هيّا النهاية
والحكاية نفس الحكاية
مش لينا يا قلبي الزمان
***