وداع يابا يا شايل همى بضلوعك
بنادى عليك ترد عليا بدموعك
عنيك عنى منزلتشى وفيها كلام
خلاص يابا هتمشى وتنطفى شموعك
بنادى عليك وبندهلك
يجينى الرد مش راجع
هنادى كتير عشان تسمع
اكيد انت اللى مش سامع
خلاص مشوارى هيضلم
وجرحى ف قلبى هيعلم
هعيش بعدك حزين مجروح
وببكى عليك وبتألم
هعيش بعدك وحيد مكسور
ومين بعدك يشيل همى
مهو انت الضى لعيونى
هعيش فى الدنيا متغمى
يا مين بعدك يواسينى
ومين حضنه يدفينى
يا مين يابا يمد ايديه
ويمسح دمعى من عينى
انا هبكى عليك عمرى
ومش هفرح فى يوم تانى
هسلم للهموم أمرى
واخلى الحزن عنوانى
هعيش العمر كله حداد
يا سيد الكل على موتك
ومش شايف وشوش بعدك
وهسمع بس ف سكوتك
ابوس ايدك تكلمنى
حنين صوتك بيوحشنى
يا ابويا قوم وعلمنى
اعيش بعدك… وودعنى
فراق الروح ولا فراقك
تهون روحى… ومتهونشى
دا لو هتغيب ف يوم عنى
سنين عمرى متكملشى
حيطان بيتنا بتبكى عليك
و فرحتنا بتصرخ ليك
وقلبى ينادى ويقولك
انا ميت اكيد بعديك
وداع يابا