ايوه ناوى ابعد واهاجر
ايوه ماشى هروح واسيبك
يا حبيبتى خلاص مسافر
م النهاردة انا مش حبيبك
لو حبيبك كنتى حسيتى بغرامى
كنتى حسيتى بألامى
كنتى حسيتى بأنينى
لو حبيبك كنتى حسيتى بمرارى
كنتى حسيتى بعذابى
كنتى حسيتى بحنينى
مش حبيبك عندى مية مليون دليل
بين هوايا وبين هواكى الف ميل
حبى ليكى هو روحى وكل عمرى
وحبك انتى …. مستحيل
فيه حبيب يجرح حبيبه
وعمره مرة ما حس بيه
فيه حبيب يمنع حبيبه
انه حتى يشوف عنيه
سيبتى حضنى اللى حماكى ف ليل شتاكى
اللى كان عاشق نداكى حتى من غير ما تناديه
كنت ادور ف الشوارع عن عيونك
كنت عاشقك عمرى ما فكرت اخونك
كنت رافض اعيش حياتى غير معاكى
كنت رافض اكمل المشوار بدونك
كنت بحلم الف حلم …
… ف قلب حلمى
جوه قلبى حفرت اسمك
مش بقلمى.. لا.. بدمى
كنتى ساكنة جوه روحى ومهجتى
كنتى أغلى من حياتى يا حته منى
كنت اغازلك حتى وانتى بعيدة عنى
كنت فاكرك وانتى مشغولة بغيرى
لما بتنسم هواكى قلبى كان يفضل يغنى
هو يعنى عشان بحبك العذاب هيكون مصيرى
لأ هفارق
م النهاردة انا مش حبيبك
اه هفارق
يا حبيبتى خلاص هسيبك
اللى عاشقك كنتى دايما تكرهيه
واللى غاشك كنتى عشقاه ودايبه فيه
اللى عمره ف يوم ما حبك تندهيلوا
واللى حبك عن حنانك تبعديه
يعنى ايه أفضل احبك
وافضل اتباها بجمالك
يعنى ايه اعشق هواكى
وحبى عمره ما جه ف بالك
لأ هفارق
لأ هفارق يا حبيبتى ومش راجعلك
حتى قلبى هرفض انه يحن ليكى
حاجة واحدة يا حبيبتى عايزها منك
قبل ما ارحل نفسى بس اشوف عنيكى
نفسى بس اشوف عنيكى